370               TESTAMENTS ENREGISTRÉS AU PARLEMENT DE PARtS            (610)
nel soit trop grant, il veult et consent qu'elle soit diminuée et ordonnée par l'advis de ses executeurs et du curé de la dicte eglise, et se d'aven­ture les diz marregliers ne s'en veulent charger et bailler de ce lettres, soit la dicte rente, laquelle est amortie par les lettres de la fondacion faicte à Saincte Genevieve, vendue et l'argent converti en messes ou donné à autre eglise qui se vouldra charger du service.
Item, le dit testateur voult et ordonna, et par ces presentes veult et ordonne que, en recompensacion et restitucion des choses mal acquises, mal prises el retenues par lui des biens d'autrui par convoitise, oubliànce ou autrement, et pour le salut de son ame, soit donné et distribué pour Dieu la somme de cent frans d'or ou la valeur en autre monnoye Je jour de son obit, qui tant trouvera lors de povres à donner quatre deniers Parisis à chascun, et ie surplus, se demourant y avoit, dedens ung mois après à povres creatures, mesnagiers honteux, et filles à marier, où l'en verra qu'il sera bien employé en la dicte parroisse Saint Estienne et de la Chapelle Gauthier, selon la bonne ordonnance de ses executeurs.
Item, il laissa à la confrarie et college des notaires et secretaires du roy nostre sire, dont l'en fait le service en l'eglise des Celestins, cinq frans, et aux religieux du dit lieu autant, pour estre acompaignié es messes, oroisons et biensfaiz des diz lieux.
Item, il laissa et quicta tout ce qui lui est et pourra estre deu à cause d'office de practique, avant qu'il feust officier du roy nostre sire, au jour de son trespassement, et veult que tous les procès et lettres qui encores en seront trouvez par devers lui, se aucuns en y a, soient ren­duz franchement sans riens en prendre ne demander.
Item, il laissa et laisse pour dix annuelx et messes faire dire et cele­brer dedens deux ans et deux mois après sa mort trois cens frans, des-quelx annuelx les deux seront faiz et célébrez pour le remede et salut de son ame en l'eglise Saincte Genevieve, en la chapelle des messes par lui fondées en la dicte eglise ou à l'autel plus prouchain du lieu où il sera enterré, par aucuns des religieux du ditlieu ou autres bons et devotz chapellains.